Jón Gunnarsson, fyrrverandi dómsmálaráðherra, segir Arndísi Önnu Kristínar- Gunnarsdóttur, þingmann Pírata, kannast vel við mál Blessing Newton og raunar hafi hún tekið beinan þátt í að synja henni um ríkisborgararétt hér á landi.
Jón telur umræður um málefni flóttafólks á Íslandi vera á villigötum. Hann segir að þeir hælisleitendur sem séu án þjónustu á götunni séu það vegna þess að þau neiti sér um þjónustu. Sú þjónusta standi alltaf til boða sé fólk tilbúið að vinna með stjórnvöldum. Fjallar hann einnig um aðkomu einstaka þingmanna vegna þess fólks sem nú er á götunni eftir synjun sinnar umsóknar.
Þetta er meðal þess sem kemur fram í nýjasta hlaðvarpsþætti Ein pæling, en Jón var gestur þáttarins. Í næsta þætti á undan var Arndís Anna gestur og þar sagðist hún ekki þekkja til máls Blessing Newton.
„Það hefði verið áhugavert fyrir þig að spyrja Arndísi Önnu að því,“ segir Jón. „Ein leiðin er að fólk getur sótt um ríkisborgararétt til Alþingis. Og það var nú út af því máli og málsmeðferð í því máli sem vantraust kom fram á mig. Við erum með undirnefnd í allsherjar- og menntamálanefnd, sem að fer yfir allar þessar umsóknir og umsagnir sem koma frá lögreglu og Útlendingastofnun. Og Arndís Anna situr einmitt í þessari þriggja manna undirnefnd ásamt Jódísi Skúladóttur frá Vinstri grænum og Birgi Þórarinssyni hjá Sjálfstæðisflokknum. Og það er þessi nefnd sem er, eins og þingið starfar, eiginlega einráð um það hvaða umsóknum sé svarað. Hún fer yfir þetta, kemur með tillögur og sú tillaga er bara samþykkt. Það er enginn sem spyr um gögnin á bak við þetta eða þau liggja ekki fyrir almennum þingmönnum. Og ein af þessum Nígerísku konum sem að er í þessum vandræðum núna og hefur verið mikið í fréttum núna, Blessing, þú kannast við það nafn, hún sótti um ríkisborgararétt til Arndísar Önnu og til þingsins. En Arndís Anna, og Jódís, og Birgir, þau ákváðu að hafna umsókn hennar.“
Jón segir að nauðsynlegt sé að sía þá sem sækja hér um til þess að sinna þeim almennilega sem að eru í raunverulegri neyð. Miðað við þann fjölda sem Ísland tekur við í dag sé ekki hægt að gera það.
Hér er hlekkur á hluta hlaðvarpsins Ein pæling með viðtalinu við Jón Gunnarsson.
