Samfylkingin undirbýr sig nú fyrir kosningar, sem gætu orðið fyrr en seinna, og Kristrún Frostadóttir, hinn nýi og skeleggi formaður flokksins treystir stöðu sína. Birtist það meðal annars í því að Helga Vala Helgadóttir hættir þingmennsku og hverfur úr stjórnmálum.

Í nýjum Dagfarapistli á Hringbraut skrifar Ólafur Arnarson að hávær orðrómur hafi verið um að Kristrún hafi ákveðið að losa sig við þrjá af núverandi þingmönnum flokksins. Helga Vala sé einn þeirra, annar sé Oddný Harðardóttir, oddviti flokksins í Suðurkjördæmi, sem muni láta af þingmennsku eftir þetta kjörtímabil. Þá hafi Kristrún og helstu áhrifamenn ákveðið að Guðmundur Árni Stefánsson, varaformaður flokksins, fyrrum ráðherra, þingmaður og sendiherra, muni leiða listann í Kraganum þar sem fyrir er á fleti Þórunn Sveinbjarnardóttir.

Ólafur gefur sér þó ekki að Þórunn hverfi endilega af þingi, enda megi Samfylkingin vænta þess að fá fjóra, jafnvel fimm, þingmenn í Kraganum miðað við skoðanakannanir síðustu 10 mánaða. Hugsanlegt sé að Þórunn og Guðmundur Árni myndi gott teymi í forystu Samfylkingarinnar í kjördæminu.

Ólafur segir Loga Einarsson og Jóhann Pál Jóhannsson njóta trúnaðar Kristrúnar og eiga vísan ráðherrastól í ríkisstjórn sem Samfylkingin eigi aðild að.

Samfylkingin þarf að mati Ólafs að vanda sig við að finna fjölda nýrra þingmannsefna. Segist hann hafa heimildir fyrir því að það verk sé í fullum gangi og vel á veg komið. Flokkurinn ætli að vera tilbúinn í slaginn hvenær sem hann kemur.

Segir Ólafur nokkra vel metna og þekkta borgara vera í startholunum, án þess að nefna nöfn.

Hann nefnir þó þær hugmyndir að krafa verði gerð um að heilbrigðisráðherrann í næstu ríkisstjórn komi úr röðum Samfylkingarinnar. Verði það ekki Dagur B. Eggertsson, borgarstjóri og læknir, hafi nafn Ölmu Möller landlæknis verið nefnt. Alma er systir Kristjáns Möllers, fyrrverandi þingmanns og ráðherra, þau séu mjög nánir félagar og standi þétt saman pólitískt. Alma er þjóðhetja eftir tveggja ára forystu í baráttu þjóðarinnar við veiruvandann.

Samfylkingin gæti þannig teflt fram heilbrigðisráðherra með læknismenntun í fyrsta skipti í Íslandssögunni.

Dagfara í heild má lesa hér.