Nýlega fengu 120 stúdentar, sem eiga að hefja nám í þjóðhagfræði við Copenhagen Business School (CBS) í lok mánaðarins, tölvupóst frá tveimur af kennurunum. Þeir sögðu að þeir myndu ekki mæta til kennslu og kenna svo lengi sem krafa sé gerð um að nemendur og kennarar framvísi kórónupassa í skólanum en í slíkum passa kemur fram hvort handhafinn sé bólusettur gegn kórónuveirunni eða hafi fengið neikvæða niðurstöðu úr sýnatöku.

Ekstra Bladet skýrir frá þessu. Fram kemur að kennararnir, þeir Rasmus Hougaard Nielsen og Ole Bjerg, hafi skrifað að eins og staðan sé núna muni þeir ekki sinna kennslu í þjóðhagfræði og að þeir hafi ekki áhuga á neinum málamiðlunum.

Í tölvupóstinum koma einnig fram mjög gagnrýnar skoðanir þeirra á viðbrögðunum við kórónuveirunni. „Við notum sjálfir ekki andlitsgrímur því við teljum þær vera niðurlægjandi tákn um kúgun. Við förum heldur ekki í sýnatöku því við teljum hana vera brot gegn helgi líkama okkar,“ segja þeir í tölvupóstinum og taka fram að hvorugur þeirra sé bólusettur gegn veirunni.

Þeir líkja síðan skólanum við þýska embættismenn í síðari heimsstyrjöldinni og líkja kórónupassanum við upphaf Helfararinnar. „Í okkar augum er ekki mikill munur á kórónupassanum og gyðingapassanum sem var notaður í síðari heimsstyrjöldinni,“ skrifuðu þeir.

Talsmenn CBS vildu ekki tjá sig um málið við Danska ríkisútvarpið (DR) eða afleiðingar þess fyrir kennarana tvo ef þeir mæta ekki til kennslu. Eina svarið sem fékkst var að CBS fari eftir fyrirmælum og leiðbeiningum yfirvalda vegna heimsfaraldursins.