Alþingiskosningar fara fram á næsta ári að óbreyttu, en kjörtímabilinu lýkur í október. Hugmyndir hafa þó verið uppi um að halda kosningar á fyrri helmingi næsta árs, en engar ákvarðanir teknar enn um það.
Samkvæmt Fréttablaðinu eru 26 þingmenn af 63 ákveðnir í að bjóða sig fram að nýju á næsta ári. Sextán sögðust óákveðnir, en 21 þingmaður svaraði engu um fyrirætlanir sínar.
Enginn þingmaður gaf það beint út að hann hygðist ekki gefa kost á sér.
Gunnar Bragi Sveinsson svaraði fyrir hönd þingflokks Miðflokksins og sagði ekki tímabært að velta slíku fyrir sér.
Þá bárust aðeins svör frá fjórum af tíu ráðherrum, frá Áslaugu Örnu Sigurbjörnsdóttur dómsmálaráðherra, Guðlaugi Þór Þórðarsyni, utanríkis- og þróunarsamvinnuráðherra, Svandísi Svavarsdóttur heilbrigðisráðherra og Lilju Alfreðsdóttur, mennta- og menningarmálaráðherra.
Þau Áslaug, Guðlaugur og Svandís hyggjast gefa kost á sér að nýju en Lilja hefur ekki gert upp hug sinn.
Þá svaraði Steingrímur J. Sigfússon, forseti Alþingis því til að félagar hans í Norðaustur kjördæmi fengu fyrst að vita um fyrirætlanir sínar og því óvíst hvort hann hyggist gefa kost á sér að nýju, en Steingrímur er bæði aldursforseti og sá sem lengst hefur setið á þingi.