Tveir hafa lýst yfir framboði til embættis gjaldkera hjá Vinstri grænum, hvers landsfundur fer fram 18.-20. október. Una Hildardóttir, sem gegnt hefur gjaldkeraembættinu síðastliðin fjögur ár, hyggst söðla um og bjóða sig fram til ritara að þessu sinni, en núverandi ritari, Elín Oddný Sigurðardóttir, hyggst ekki gefa kost á sér aftur. Fær Una samkeppni frá Ingibjörgu Þórðardóttur um ritaraembættið, en sem kunnugt er þá er Una tengdadóttir Steingríms J. Sigfússonar, forseta Alþingis og fyrrverandi formanns VG.
Þeir sem sækjast eftir gjaldkeraembættinu eru þeir Ragnar Auðun Árnason, stjórnmálafræðingur og Rúnar Gíslason, lögreglumaður á Sauðárkróki, sem gegnt hefur trúnaðarstörfum fyrir flokkinn og verið í framboði til Alþingiskosninga.
Verði Ragnar kosinn gjaldkeri, mun það teljast býsna snöggur frami innan flokksins, en Ragnar var kosinn formaður VG í Reykjavík í síðasta mánuði á aðalfundi félagsins. Ragnar er einnig fyrrum talsmaður Ungra Vinstri Grænna og þess má geta að hann er sonur Árna Þórs Sigurðssonar, sendiherra Íslands í Finnlandi, og fyrrverandi þingmanns og þingflokksformanns VG.
Þá er Rúnar sonur hins kunna sjónvarpsmanns, Gísla Einarssonar á RÚV.
Þá hefur utanþingsráðherrann Guðmundur I. Guðbrandsson, gefið kost á sér til varaformennsku í VG, en núverandi formaður Edward Hákon Huijbens hyggst ekki gefa kost á sér. Hefur Guðmundur ekki fengið mótframboð.