Í Korni Íslandsbanka er því spáð að peningastefnunefnd Seðlabankans ákveði að lækka vexti um 0,25 prósentustig við næstu vaxtaákvörðun þann 28. ágúst. Meginvextir bankans, vextir á 7 daga bundnum innlánum, verða samkvæmt því 3,50%.
Nýr seðlabankastjóri, Ásgeir Jónsson, hefur sagt í viðtölum að frekari lækkun vaxta á næstunni sé möguleg.
Við síðustu ákvörðun, í júní síðastliðnum, lækkaði peningastefnunefnd stýrivexti um 25 punkta og hafa þeir lækkað um 75 punkta það sem af er þessu ári. Í júní voru fjórir meðlimir nefndarinnar fylgjandi því að lækka vexti en einn nefndarmaður greiddi atkvæði gegn lækkun og vildi halda vöxtum óbreyttum. Við ákvörðunina var horft til þess að samdráttur í þjóðarbúskapnum gæti varið lengur en áður var talið, verðbólguvæntingar hefðu lækkað frá síðustu ákvörðun og að útlit væri fyrir að verðbólga myndi hjaðna í átt að markmiði (2,5%) á þessu ári.
Frá síðustu ákvörðun hafa ekki verið miklar sviptingar í efnahagslífinu, fyrir utan nokkra styrkingu krónunnar í júlí. Enn er útlit fyrir samdrátt á árinu ásamt því að slaknað hefur bæði á verðbólguvæntingum og verðbólguhorfum. Að mati nefndarmanna mun peningastefnan á næstunni ráðast af samspili þróunar efnahagsumsvifa annars vegar og verðbólgu og verðbólguvæntinga hins vegar.
„Við teljum að það gefi sterklega til kynna að nefndarmenn séu tilbúin til að lækka vexti enn frekar og taki skrefið til 25 punkta lækkunar í næstu viku.“
segir í Korni Íslandsbanka.
