Alþingi auglýsir á heimasíðu sinni að það hyggist veita styrk til meistaraprófsritgerðar er varðar Alþingi. Styrkurinn nemur 400 þúsund krónum. Styrknum er ætlað að „stuðla að rannsóknum á hlutverki Alþingis í lýðræðisskipan Íslands, verkefnum þingsins og starfsemi þess almennt. Rannsóknin er ekki bundin við tilteknar fræðigreinar,“

segir í auglýsingunni.

Styrkurinn er veittur til einstaklinga sem vinna að lokaverkefni til meistaranáms, að lágmarki 30 ETCS einingar, við íslenska eða erlenda háskóla. Er hann greiddur út í tvennu lagi; Helmingur þegar rannsóknaráætlun verkefnisins hefur verið samþykkt af leiðbeinanda og lokagreiðslan þegar verkefninu hefur verið skilað.

Samkvæmt þessu má segja, að ef meistararitgerð sem fjallar um hátíðarfund Alþingis á Þingvöllum þann 18. júlí, hlýtur styrkinn, muni útgjöld Alþingis vegna fundarins aukast um 400.000 krónur.

Í heildina kostaði Þingvallafundurinn tæpar 87 milljónir króna, en upphaflega var gert ráð fyrir 45 milljónum, þó viðbúið væri að kostnaðurinn gæti aukist „eitthvað“ eftir umfangi.

Áhugasömum ritgerðarskrifurum er bent á að umsóknarfrestur er til 29. október 2018. Umsókn skal send á netfangið heidrunp@althingi.is

Í umsókn um styrk skal eftirfarandi koma fram:

a. Nafn, heimilisfang og tölvupóstfang umsækjanda.

b. Lýsing á viðfangsefni rannsóknarinnar og á hvern hátt hún er fallin til að varpa ljósi á umfjöllunarefnið (200-500 orð).

c. Tímaáætlun um framvindu.

Umsókn skal fylgja ferilskrá umsækjanda og samþykki leiðbeinanda fyrir rannsókninni sem lokaverkefni.

Gert er ráð fyrir að Alþingi fái kynningu á niðurstöðum rannsóknarinnar auk prentaðs eintaks af henni.