Vigdís Hauksdóttir, oddviti Miðflokksins í Reykjavík, hyggst taka upp málefni Orkuveitunnar á fundi borgarráðs á fimmtudag. Hún greinir frá þessu á Facebook og segir fróðlegt að sjá hvort „allt verði gert til að hindra framgöngu málsins á þeim vettvangi.“
Í annarri færslu frá í gærkvöldi snýr Vigdís Orkuveitumálinu upp á meirihluta borgarstjórnar vegna dómsmálsins þar sem Reykjavíkurborg var gert af Héraðsdómi Reykjavíkur að greiða starfsmanni sínum bætur vegna framkomu skrifstofustjóra borgarstjóra í hans garð:
„Formaður borgarráðs talaði skýrt í kvöld. Það á að taka fast á starfsmannamálum borgarinnar. Það á líka að eiga við í ráðhúsinu – að þeir sem brjóta af sér gagnvart undirmönnum sínum verði látnir axla ábyrgð. Þetta á ekki bara að eiga við þegar karlmenn brjóta á rétti kvenna – heldur líka þegar konur brjóta á rétti karla – sér í lagi þegar dómar liggja til grundvallar. Líklega eru nýjir tímar runnir upp í Reykjavík . Ég fagna því …!!! Dropinn holar steininn :-)“
Hildur Björnsdóttir, borgarfulltrúi Sjálfstæðisflokksins hefur einnig kallað eftir hlutlausum rannsóknaraðila til þess að fara yfir mál Orkuveitunnar, eftir að formaður stjórnar OR óskaði eftir því í gær að innri endurskoðun Reykjavíkurborgar gerði úttekt á vinnustaðarmenningu og tilteknum starfsmannamálum inann OR.
Þá segir Eyþór Arnalds, oddviti Sjálfstæðismanna í Reykjavík, við Morgunblaðið að upplýsingar hafi borist um að starfsmenn OR hafi leitað til borgarstjóra þar sem þeir töldu á sér brotið. Því hafi verið óskað eftir upplýsingum um þau samskipti og hvernig brugðist hafi verið við þeim af hálfu borgarstjóra.
Sjá nánar: Áslaug er konan sem var rekin – „Ég ætlaði aldrei að verða ,,þessi kona”
Sjá nánar: Framkvæmdastjóri hjá Orkuveitunni viðurkennir kynferðislega áreitni
Sjá nánar: Mikil ólga meðal starfsmanna Orkuveitunnar – Undrast aðgerðarleysi starfsmannastjórans
