Gunnar Smári Egilsson, stofnandi Sósíalistaflokks Íslands, kann almenningi litlar þakkir fyrir meðhöndlun valds síns sem kjósenda, ef marka má orð hans á Facebook í dag. Hann virðist ekki par ánægður með að þeir hafi með „aðgerðaleysi“ sínu komið hinum ríku og elítunni í kringum þá, til valda:
„Þið áttið ykkur á að eftir að kosningaréttur varð almennur þá hafið þið völdin. Hinir ríku og elítunnar, sem þjóna þeim, eru með þau völd sem þið hafið fært þeim með aðgerðarleysi ykkar,“
segir Gunnar Smári.
Hann líkir þessu „ástandi“ við vistarbandið til forna:
„Þetta ástand er svipað og ef vistarböndin hefðu í raun haldið áfram eftir að þau voru felld niður; að vinnufólkið hefði bundið sig sjálft og sjálfviljug í ánauðarvinnu og geldlífi hjá stórbændum, kosið eymd og kúgun fremur en frelsi og gjöfult líf.“
Þá segir Gunnar að almenningur kjósi að nýta ekki vald sitt sem lýðræðið færði þeim:
„Lýðræðið færði almenningi völdin en hann hefur hingað til kosið að taka þau ekki. Almenningur hefur öll völd. Hann þarf bara að taka þau og nýta þau sér í hag.“
Í athugasemdarkerfinu er Gunnari vinsamlegast bent á, að kannski hljómi færsla hans eins og skammarræða. Betur færi á að orða þetta á annan hátt, sem næði betur til kjósenda.