Bretar láta í minni pokann í áróðursstríði við Rússa vegna Skripal-tilræðisins. Um þetta má lesa í Guardian dagsins. Breskir ráðamenn standast áróðurs- og netmiðlamaskínum Kremlverja ekki snúning. Allt í einu virðist málstaður Breta frekar veikur.
Það hjálpar heldur ekki að Boris Johnson utanríkisráðherra gerir enn eina skyssuna og fer nú að verða stór spurning hvernig hann lafir í sínu háa embætti. Johnson sagði í viðtali við þýskan fjölmiðil að hann hefði sjálfur talað við vísindamenn í efnarannsóknastöðinni Porton Down og þeir hefðu fullyrt að það væri enginn efi á að Rússar bæru ábyrgð á árásinni.
Annað hvort misminnir Johnson, hann færir í stílinn – ellegar þá að vísindamennirnir hafa dregið í land. Framburður þeirra nú er ekki sé hægt að staðhæfa sem svo enginn efi leiki á að taugaeitrið sem var notað komi frá Rússlandi. Þetta hafa Rússar nýtt sér til hins ítrasta. En kannski var heldur ekki von á öðru frá vísindamönnunum. Þeir hafa hins vegar greint efnið sem novichok, eitur sem er ætlað til notkunar í hernaði. Ekki er vitað að önnur ríki en Rússland ráði yfir þessu efni. Guardian segir að Bretar ættu að byggja málflutning sinn á því.
En á meðan þetta gerist stendur rannsókn á málinu ennþá yfir. Rússar eru farnir að halda því fram að Bretar standi sjálfir bak við tilræðið – beinlínis í því skyni að ögra. Þannig æsist hin pólitíska deila meðan rannsóknin gengur á hraða snigilsins. Rússar eru miklu í því að hafa áhrif á almenningsálitið en Bretar, þeir eru í afar góðri æfingu. Allt í einu virðist það sem leit út fyrir að vera diplómatískur sigur fyrir Breta vera að snúast í höndunum á þeim. Því heldur þessi barátta áfram og þar hjálpar hinn lausmáli Boris Johnson ekki.