Herðubreið er eins konar svar Samfylkingarinnar við vefnum AMX sem ofstækisfyllsti hluti Sjálfstæðisflokksins heldur úti.

Á þessum vefsíðum birtast hugleiðingar dýpst innan úr myrkustu skúmaskotum flokkanna – og sýna hvernig fanatískustu flokksmenn hugsa – og kannski líka valdamenn í flokkunum, svona þegar almenningur heyrir ekki til.

Því að sumu leyti vantar ekki hreinskilnina í þessar vefsíður; það er bara svo ankanalegt að sjá hvernig útkoman verður þegar ræður ferðinni hreinræktuð flokkshugsun.

Í grein í Herðubreið er Jón Sigurðsson, fyrrverandi stjórnarformaður Fjármálaeftirlitsins, mærður út eitt. Niðurstaðan er að þetta sé stórkostlegur bankamaður sem lítilsigldir gagnrýnendur kunni ekki að meta, skilja einfaldlega ekki.

Skiptir þá engu að Jón var annar helsti valdamaðurinn í þeirri stofnun sem átti að hafa eftirlit með íslenska bankakerfinu á tímanum þegar það hrundi.

Þrátt fyrir það telur Herðubreið að hann njóti mikillar virðingar erlendis.

Rifjast þá upp að forstjóri FME hélt hundrað fundi á síðustu misserum bankakerfisins þar sem hann lýsti því hvað það væri frábært. Og að í ágúst 2008 stóðust íslensku bankarnir álagspróf FME með glans, það var innan við tveimur mánuðum fyrir hrun.

Og að sjálfur stjórnarformaðurinn kom fram í auglýsingapésa frá Landsbankanum þegar Icesave reikningarnir voru opnaðir í Hollandi – fyrripart árs 2008. Bæklingurinn bar yfirskriftina Icesave launched in the Netherlands en fyrirsögn viðtals við Jón Sigurðsson sem þar birtist var Finances of the Icelandic banks are basically sound.

Og að viðskiptaráðherrann sem nú situr, Gylfi Magnússon, hefur sagt að það sé líkast því að FME hafi spilað með hinu liðinu.