Love Island-stjarnan Molly Mae Hague viðurkennir að hún „gekk of langt“ með fylliefni eftir að síðustu þáttaröð Love Island lauk. Molly Mae, 20 ára, segir að hún er nú búin að láta leysa upp fylliefni í andliti sínu eftir að hafa verið skotmark nettrölla vegna útlit síns.
Hún opnaði sig um þetta á YouTube, en ásamt því að vera raunveruleikastjarna er Molly Mae einnig áhrifavaldur.
„Ég er búin að láta leysa upp nánast allt fylliefnið í andliti mínu. Augljóslega var ég með varafyllingar áður en ég tók þátt í Love Island og eftir að ég yfirgaf húsið (e. the villa) fékk ég mér meira fylliefni í varirnar. Fyrir mig var þetta versti tíminn, þegar ég yfirgaf þáttinn. Nettröllin voru alveg rosaleg þá. Þetta var skelfilegt. Ég skil alveg af hverju þetta gerðist, því ég gekk of langt með fyllingarnar. Og ég áttaði mig ekki alveg á því sem ég var að gera og bara gekk of langt,“ segir hún.
„Þetta var bara virkilega slæmur tími. Ég var nýbúin að yfirgefa þáttinn og það er tíminn þar sem fólk dæmir þig sem mest.“
Hún bætir við að hún hafi áttað sig á því sjálf að hún hafi gengið of langt, það þurfti því enginn að vera svona ljótur við hana.
„Besta ákvörðun sem ég hef tekið er að láta leysa upp fylliefnið,“ segir hún. Hún lét einnig leysa upp fylliefni í kjálkalínunni.
„Fólk sagði að hausinn minn væri í laginu eins og kassi og ég liti út eins og SpongeBob,“ segir Molly Mae.
„Varðandi fyllingar, ég mæli ekki með þeim. Þetta er mjög persónulegt. En ljótu skilaboðin sem ég fékk voru hræðileg […] Bara stanslaus komment við hverja mynd. En ég get ekki bara slökkt á símanum mínum, ég verð að lesa þau öll.“
