Kristbjörg Eva Andersen Ramos rak upp stór augu í gær þegar hún leit út um gluggann heima hjá sér og ætlaði að kalla á kisuna sína hann Castro.
„Ég var að pæla í því hvar hann væri því það var að koma matartími hjá þeim. Vanalega er nóg að kalla í hann út um gluggann þannig að ég leit út og skimaði eftir honum. Það fyrsta sem ég sé er að hann er að bera svakalegt kjötstykki,“ segir Kristbjörg í samtali við blaðakonu.
Kötturinn Castro er eins og hálfs árs gamall og hafði hann gert sér lítið fyrir og rænt sér stórum hrygg sem hann bar sjálfur með naumindum.
„Örlög kjötsins voru þau að það fót beint í ruslið. Ég og kærasti minn komum að honum fyrir utan húsið og þar sat hann stoltur af sínu. Við tókum kjötið i burtu því það var augljóslega ekki í lagi. Við erum ekki viss hvort einhver sakni kjötsins en ef svo er þá er ég alveg tilbúin til þess að bæta það upp. Við vitum ekkert hvar hann fann þetta. Hann fékk auðvitað smá glaðning eftir þetta allt saman því þetta var ekkert smáræði.“
Myndband sem Kristbjörg náði af Castro bera feng sinn má sjá hér fyrir neðan:
