Við krakkarnir tókum okkur til um daginn og föndruðum skraut á jólagjafirnar og jólatréð. Þetta er sennilega með því auðveldara sem ég hef gert en það eina sem við notuðum var hvítur sjálf-harðnandi leir, piparkökumót, smjörpappír, kökukefli, rör og lítill bútur af greni. Þetta kom ótrúlega vel út og ég er mjög spennt fyrir því að skreyta með þessu. Ég keypti aðeins of mikið af leir og notaði tækifærið og lét krakkana útbúa handaför til að hengja upp. Þeim fannst það mjög gaman og eru spennt fyrir því að sjá hendurnar sínar á veggjunum.
En til að gera grenimynstur í stjörnurnar flatti ég leirinn út, lagði grenið yfir og renndi svo létt yfir með kökukeflinu. Svo skar ég þær út með piparkökumótinu. Ég bjó svo til gat fyrir borða með rörinu. Mér finnst þetta koma ótrúlega skemmtilega út og held að þetta eigi eftir að tóna vel með rauðu jólakúlunum eða með smá greni á jólapökkunum. Svo er líka hægt að mála þennan leir og var ég með einhverjar hugmyndir um að mála grenimynstrið í gylltu, en ég held ég leyfi þeim að njóta sín svona. Allavega þetta árið.
Færslan er skrifuð af Fjólu og birtist upphaflega á Amare.is
