Neytendastofa hefur sektað fyrirtækið Sif verslun sem rekur samnefnda netverslun fyrir að hafa kynnt svokallaða NatPat plástra, sem seldir voru í versluninni, með ósönnum fullyrðingum um virkni þeirra og áhrif á heilsu fólks. Fullyrt var meðal annars að þeir gætu dregið úr þunglyndi og kvíða.
Í kjölfar ábendingar óskaði Neytendastofa eftir sönnunum fyrir ýmsum fullyrðingum verslunarinnar um virkni plástranna. Fullyrti verslunin í kynningu að mismundandi tengundir plástranna hjálpuðu til að koma í veg fyrir sólbruna, drægju úr einkennum kvíða, ADHD og einhverfu, hjálpuðu við að stjórna tilfinningum eins og streitu og kvíða, hefðu góð áhrif á svefn, drægju úr kláða eftir skordýrabit og loks var ein tegund plástranna sögð hjálpa til við stýra löngun í svokallað ruslfæði.
Í svari verslunarinnar var vísað í hlekki á vefslóðir sem áttu að leiða að vísindalegum rannsóknum sem sanna áttu fullyrðingarnar frekar.
Sagði Neytendastofa í svari til verslunarinnar að henni bæri að vísa með beinum hætti hvar á þessum vefslóðum mætti finna sönnun fyrir hverri og einni fullyrðingu.
Segir í ákvörðun Neytendastofu að verslunin hafi svarað með því að breyta lýsingum á vörum sem til sölu voru í versluninni en hafi síðan í svari sínu vísað beint til setninga í rannsóknum sem sannana fyrir fullyrðingum sínum. Í ákvörðun Neytendastofu er gerð grein fyrir rökstuðningi og tilvísunum verslunarinnar við hverja og eina fullyrðingu sem stofnunin hafði gert athugasemd við.
Í niðurstöðu Neytendastofu er sérstaklega tekið fram að verslunin hafi fjarlægt fimm af þeim ellefu fullyrðingum sem stofnunin gerði athugasemd við.
Segir að í aðsendu efni frá versluninni, við beiðni Neytendastofu um rökstuðning, að undanskyldri vefsíðu framleiðanda, hafi ekki verið að finna beina umfjöllun um þá plástra sem félagið selji og fullyrðingarnar snúi að. Þá fjalli rannsóknir og greinar, sem verslunin vísi í, um virkni ilmkjarnaolíu, sem sé aðal innihaldsefni plástranna, með almennum hætti en ekki með beinum hætti um það hvort NatPat plástrar skili þeim árangri sem verslunin fullyrði að þeir geri.
Segir einnig í ákvörðun Neytendastofu að þegar seljendur beiti fullyrðingum í kynningarefni sínu um eins mikilvæga hagsmuni og líkamlega og andlega heilsu neytenda, verði þeir að geta gengið út frá því að fullyrðingarnar standist og séu ekki villandi um raunverulega virkni eða hlutverk viðkomandi vöru. Verði því að gera ríkar kröfur til sönnunar á fullyrðingum seljanda er snúi að því að vara geti læknað sjúkleika, röskun á líffærastarfsemi eða vansköpun.
Telur Neytendastofu fulllyrðingar verslunarinnar um virkni plástranna veita rangar upplýsingar sem séu líklegar til að valda því að hinn almenni neytandi taki viðskiptaákvörðun sem hann myndi ekki annars hafa tekið. Þá séu fullyrðingarnar líklegar til að raska verulega fjárhagslegri hegðun neytenda. Að mati stofnunarinnar séu umræddar fullyrðingar ennfremur settar fram með þeim hætti að því sé haldið fram að vörurnar geti haft jákvæð áhrif til að draga úr ýmsum kvillum líkt og um lyf sé að ræða. Telur Neytendastofa að með birtingu á framangreindum fullyrðingum um virkni NatPat plástra hafi verslunin haldið því ranglega fram að vörurnar geti læknað sjúkleika eða röskun á líffærastarfsemi.
Í ljósi alls þessa er það niðurstaða Neytendastofu að um brot á lögum um eftirlit með viðskiptaháttum og markaðssetningu sé að ræða. Við hæfi þótti að sekta verslunina um 100.000 krónur og banna henni að viðhafa umrædda viðskiptahætti framvegis.
