Síðastliðinn sunnudag var dagur Norðurlanda en hann er 23. mars ár hvert og er ætlunin með honum að fagna norrænni samvinnu. Í tilefni dagsins birtu sendiráð Norðurlandanna í Tékklandi myndband á Instagram sem á með táknrænum hætti að sýna þróun norrænnar samvinnu í gegnum söguna. Athygli vekur að í myndbandinu kemur Ísland ekki fyrir á nokkurn hátt þótt það eigi í orði kveðnu að teljast til Norðurlandanna sem fimmta sjálfstæða ríkið í þeim hópi.
Í myndbandinu má sjá 3 ungar konur og einn ungan karlmann. Á karlinum má sjá fána Finnlands en á einni konunni fána Danmerkur, annarri fána Noregs og þeirri þriðju fána Svíþjóðar. Í upphafi myndbandsins slæst unga fólkið í léttum dúr til að sýna að áður fyrr hafi Norðurlöndin deilt mjög og átt í beinum átökum en myndbandið endar á því að allt er fallið í ljúfa löð og samvinnan ein ræður ríkjum eins og raunin er sögð vera í nútímanum. Enga manneskju má hins vegar sjá með fána Íslands á sér.
Í texta við myndbandið, á ensku, segir að fortíð Norðurlandanna sé flókin en í dag sameinist þau um að byggja á lýðræði, frelsi, friði og velsæld. Segir einnig að svæðisbundin samvinna hafi aldrei verið eins mikilvæg og því þeim efnum leiði Norðurlöndin með fordæmi sínu. Í lok færslunnar eru Norðurlöndin auðkennd með myllumerkinu # hinu alþjóðlega merki sem notað er til að merkja færslur á samfélagsmiðlum með þeim einstaklingum, hópum, löndum o.s.frv. sem viðkomandi færsla snýst um.
Með þessum hætti eru merkt í færslunni Danmörk, Noregur, Finnland og Svíþjóð en ekki Ísland.
Við færsluna er rituð athugasemd undir merkjum Instagram-aðgangs danska sendiráðsins í Tékklandi. Í athugasemdinni segir að unga fólkið í myndbandinu sé allt starfsnemar í norrænu sendiráðunum í Tékklandi en þar sem Ísland sé ekki með sendiráð í landinu hafi verið ákveðið að hafa það ekki með, þótt það sé mikilvægur hluti af norrænu samstarfi.
Þó nokkrir gera athugasemdir við fjarveru Íslands í myndbandinu og benda á að hægt hefði verið að minnsta kosti að geta Íslands með myllumerki í lok færslunnar eins og hinna ríkjanna fjögurra.
Einn Íslendingur ritar athugasemd við færsluna á dönsku sem útleggst svo, í þýðingu DV:
„Dæmigert. Ísland er gleymda landið.“
Færsluna með myndbandinu má sjá hér fyrir neðan. Sjáist það ekki er ráð að endurhlaða síðuna eða opna hana í öðrum netvafra.
