Magnús Már Einarsson, þjálfari nýliða Aftureldingar í Bestu deild karla, var gestur Helga Fannars Sigurðssonar og Hrafnkels Freys Ágústssonar í Íþróttavikunni á 433.is.

Aftuerelding fór upp í gegnum umspil Lengjudeildarinnra í fyrra eftir að hafa valdið vonbrigðum í deildinni lengi vel. Árið áður hafnaði liðið í öðru sæti deildarinnar en tapaði svo í úrslitaleik umspilsins.

„Það er mjög skrýtið að segja það en ég er þakklátur fyrir að hafa tapað úrslitaleiknum 2023. Ég var ekki þakklátur mínútu eftir leikslok en fyrst þetta spilaðist svona er það bara ómetanleg reynsla sem við náðum að afla okkur. Ég, fólkið í kringum félagið og leikmenn. Þetta var mikið högg 2023, við spiluðum frábært tímabil og fannst við eiga skilið að fara upp. Við náðum að gíra okkur upp, æfðum betur og vorum í ennþá betra formi í fyrra. Erfiðleikar í byrjun og ná aftur að vinna okkur upp úr þeim, fara aftur á Laugardalsvöll og vinna úrslitaleikinn. Þetta er ótrúlega mikill skóli fyrir alla í kringum þetta og það mun hjálpa okkur mikið í sumar,“ sagði Magnús í þættinum.

„Við vorum í níunda sæti í Lengjudeildinni í júlí í fyrra og það hafði enginn trú á að við værum að fara upp nema bara klefinn. En við höfðum allan tímann trú. Þú hefðir ekki hitt mann sem hafði minnstu efasemdir um að fara upp.“

Umræðan í heild er í spilaranum.