Þó Liverpool sé svo gott sem búið að tryggja sér Englandsmeistaratitilinn í febrúar telur Jamie Carragher, goðsögn félagsins og sparkspekingur, að það þurfi að styrkja nokkrar stöður í sumar.
Þetta sagði hann á Sky Sports eftir 0-2 sigur Liverpool á Manchester City í gær. Liverpool er nú með 11 stiga forskot á Arsenal á toppi deildarinnar og um algjört draumatímabil að ræða hjá Arne Slot á hans fyrsta ári við stjórnvölinn.
„Slot mun þekkja þennan hóp mun betur á næstu leiktíð. Hann notar bara 14-15 leikmenn í raun og vera og það eru sennilega 4-5 sem eru ekki hans menn,“ sagði Carragher eftir leik.
„Þó liðið verði meistari þarf samt að styrkja þrjár stöður að mínu mati. Ég held að það þurfi vinstri bakvörð, sóknarsinnaðan miðjumann og framherja. Liverpool á peninginn og það væri spennandi,“ sagði hann enn fremur.
Framtíð lykilmanna Liverpool hefur verið í umræðunni þrátt fyrir frábært gengi liðsins. Mohamed Salah, Virgil van Dijk og Trent Alexander-Arnold eru allir að verða samningslausir í sumar.
