Virgil van Dijk, fyrirliði Liverpool, hefur viðurkennt það að hann gæti verið á förum frá félaginu fyrir næstu leiktíð.

Van Dijk verður samningslaus í sumar en hann hefur verið orðaður við þónokkur félög eftir virkilega góða frammistöðu á Anfield undanfarin ár.

Hollendingurinn er sjálfur rólegur yfir stöðunni en hann tjáði sig fyrir leik gegn Manchester City sem fer fram í dag.

,,Á næstu mánuðum þá þurfum við að gefa allt í verkefnið. Við erum enn á lífi í þremur keppnum og það er markmiðið sem ég er með. Ég er með mjög stór markmið þegar kemur að því,“ sagði Van Dijk.

,,Því miður þá get ég ekki talað um mín samskipti við félagið. Við höfum rætt saman í dágóðan tíma og það eina sem ég get sagt er að ég elska þetta félag. Ég er mjög rólegur.“

,,Svo lengi sem ég er rólegur þá geta stuðningsmenn verið rólegir. Ef það koma einhverjar fréttir þá fáið þið að heyra af þeim. Eins og er þá veit ég ekki hvar ég mun spila á næstu leiktíð.“