Gary Neville fyrrum fyrirliði Manchester United telur að Ruben Amorim stjóri félagsins fari að missa traust leikmanna ef gengi liðsins fer ekki að batna.

Gengi United hefur verið hörmulegt undir stjórn Amorim og ljóst að stjórinn er í holu.

Amorim tók við af Erik ten Hag í nóvember. „Ég taldi að hlutirnir yrðu betri hjá Amorim, krafturinn í honum og nýja kerfið. Ég hélt að leikmennirnir myndu kaupa þetta og koma sér í gang,“ sagði Neville.

„Þetta hefur farið í hina áttina, þetta eru miklu verra en þetta var áður og það kemur mér á óvart.“

Neville telur að næsta tímabil gæti orðið ansi erfitt ef Amorim tekst ekki að fara að koma United á eitthvað skrið.

„Það verður meiri sársauki á þessu tímabili og það mun valda skaða.“

„Þeir munu halda Amorim en með hverju tapi þá verður erfiðara að selja mönnum þetta plan. Þessar hugmyndir sem hann ræddi um í byrjun.“

„Leikmennirnir verða að kaupa þetta, ef þú tapar því og færð gagnrýni. Þú getur ekki bara tapað leikjum, leikmennirnir munu á endanum tapa trúnni.“