Víkingur vann Leikni 3-2 í lokaleik liðanna í Reykjavíkurmótinu um helgina en Leikni verður dæmdur 3-0 sigur þar sem Víkingur heldur áfram að nota Stíg Diljan Þórðarson, sem gekk í raðir félagsins í vetur frá Triestina á Ítalíu, en hann er ekki kominn með leikheimild. Þetta er í þriðja sinn sem félagið teflir viljandi fram ólöglegum leikmanni og fær því dæmt tap sem og peningarefsingu eins og í hin tvö skiptin.
Í þetta sinn er sektin þó 120 þúsund krónur en ekki 60 þúsund eins og í hin tvö skiptin. Ástæðan er sú að Knattspyrnuráð Reykjavíkur, sem heldur utan um Reykjavíkurmótið, ákvað að fylgja sömu reglum og eru í gildi í Lengjubikarnum er snýr að sektarákvæðum. KSÍ breytti sektarákvæðum í þeirri keppni í síðustu viku, en þetta segir Birkir Sveinsson mótastjóri sambandsins í samtali við 433.is.
Víkingur hefur því greitt 240 þúsund krónur fyrir að nota Stíg Diljan í Reykjavíkurmótinu í ár.
Í leik Víkings R. og Leiknis R., í Reykjavíkurmóti karla, sem fram fór þann 25. janúar tefldi lið Víkings R. fram ólöglegum leikmanni.
Stígur Diljan Þórðarson spilaði með Víking R. í leiknum en var skráður í lið erlendis. Af þessum sökum hefur Víkingur R. verið sektað um 120.000 krónur. Úrslitum leiksins er breytt í 3-0 Leikni R. í vil.
Úr ábendingum sem sendar voru til þátttakenda í Reykjavíkurmóti meistaraflokks:
Félag, sem notar leikmann sem ekki hefur keppnisleyfi með því eða notar leikmann, þjálfara eða forystumann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Staðfesti skrifstofa KSÍ að þátttakandi hafi verið óhlutgengur í leik skal mótanefnd þegar í stað skrá úrslit leiksins skv. ofangreindu og tilkynna það viðkomandi félögum. Heimilt er að kæra slíka skráningu til aga- og úrskurðarnefndar KSÍ og skal kærufrestur telja frá þeim degi sem tilkynningin er gefin út. Viðkomandi félög verða sektuð samkvæmt reglugerð KSÍ um Deildarbikarkeppni .
Samkvæmt reglum KSÍ um Deildarbikarkeppni segir í grein 10.1:
Lið, sem mætir ólöglega skipað til leiks, skal sæta sekt að upphæð kr. 30.000 og að auki kr. 30.000 fyrir hvern leikmann sem ekki hefur keppnisleyfi með viðkomandi félagi og tekur þátt í leiknum. Félag, sem notar leikmann, þjálfara eða forystumann í leikbanni, skal sæta sektum að upphæð kr. 100.000.
