Guðmundur Benediktsson, ástsælasti íþróttalýsandi þjóðarinnar, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.
Það var að sjálfsögðu rætt um enska boltann í þættinum og þær hörmungar sem fjórfaldir meistarar Manchester City eru að ganga í gegnum.
„Við erum í desember og ég er eiginlega tilbúinn að segja að þeir vinni ekki deildina. Ég hef spáð þeim sigri í deildinni síðustu sjö ár allt og aldrei skipt um skoðun,“ sagði Guðmundur.
Rodri, miðjumaður liðsins, meiddist og hefur það án efa haft mikil áhrif.
„Þeir misstu Rodri, besti leikmaður heims. Rétt áður var Rodri sjálfur að tala um álagið væri ekki mennskt, þetta væri ávísun á meiðsli. Guardiola var að tala um þetta líka. Stundum þegar þú ferð að tala um svona hluti ferðu líka að trúa því að þetta sé bara of mikið álag og þá finnurðu ekki þessa orku sem þarf til að spila í ensku úrvalsdeildinni, Meistaradeildinni og öllum þessum keppnum. Þetta fer í hausinn á þér.
Ég held að það sé ein af ástæðunum fyrir þessu en þær eru fjölmargar.“
Umræðan í heild er í spilaranum.
