Eins og gengur og gerist eru skiptar skoðanir á meðal stuðningsmanna í kjölfar þess að Freyr Alexandersson var látinn fara sem þjálfari Kortrijk í belgísku úrvalsdeildinni.
Freyr tók við fyrir um ári síðan og bjargað Kortrijk á magnaðan hátt frá falli úr belgísku úrvalsdeildinni á síðustu leiktíð.
Gengið undanfarið hefur ekki verið gott og liðið í þriðja neðsta sæti eftir 18 leiki. Einhverjir stuðningsmenn kölluðu eftir höfði Freys sem nú er farinn.
Meira
Freyr látinn fara í Belgíu
Fjöldi stuðningsmanna Kortrijk hefur tjáð sig um ákvörðun félagsins um að láta Frey fara.
„Nú þurfa leikmenn að sanna að það séu næg gæði í þessum hópi. Ég er viss um að við getum snúið þessu við með nýjum þjálfara,“ skrifaði einn þeirra.
„Þetta er ekki þjálfaranum að kenna. Verst að það er ekki hægt að reka þessa glötuðu leikmenn,“ skrifaði annar og fleiri tóku í svipaðan streng.
„Það er ekki allt þjálfaranum að kenna. Fyrirliðinn er líka slakur og það er tími til að hressa upp á alla þætti liðsins.“
Einhverjir voru þó alveg sammála Kortrijk, það hafi verið rétt ákvörðun að láta Frey fara.
„Einni viku of seint en rétt ákvörðun,“ skrifaði einn.
„Þetta var óhjákvæmilegt. Hann bætti liðið mikið þegar hann kom en úrslitin á þessari leiktíð hafa ekki verið nógu góð,“ skrifaði annað.
Einn stuðningsmaður var svo með einföld skilaboð. „En leiðinlegt,“ skrifaði hann.
