Sævar Atli Magnússon, landsliðsmaður og leikmaður Lyngby í Danmörku, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Sævar er sem stendur eini Íslendingurinn í röðum Lyngby en fyrir aðeins um ári síðan voru þeir fimm, þjálfarinn Freyr Alexandersson, Gylfi Þór Sigurðsson, Kolbeinn Birgir Finnsson og Andri Lucas Guðjohnsen, auk Sævars.

Sóknarmaðurinn viðurkennir að hann sakni þess að hafa alla þessa íslensku leikmenn með sér úti.

„Að sjálfsögðu. Þetta var ótrúlega gaman. Þegar við vorum að fá þessar fréttir af því að Gylfi væri að koma sendi Freysi á mig skilaboð og bað mig um að bjóða Gylfa út að borða eða eitthvað. Það var smá súrealískt að ég ætti að bjóða Gylfa út að borða,“ sagði Sævar og hló, en það vakti gríðarlega athygli þegar Gylfi gekk í raðir Lyngby haustið 2023.

„Við vorum mjög mikið saman og allir fjórir frekar ólíkir. Það var mjög gaman að hanga með þeim og ég sakna þess að hafa þá. En það er gaman að sjá að þeir hafi tekið góð skref,“ sagði Sævar um Íslendingana.

Gylfi spilar í dag með Val en Kolbeinn og Andri tóku skrefið til Hollands og Belgíu. Freyr tók þá við liði Kortrijk í belgísku úrvalsdeildinni.

Umræðan í heild er í spilaranum.