Einstaklingurinn sem rændi kettinum landsfræga Díegó um síðustu helgi gaf öðrum aðila hann í jólagjöf en sá aðili hafði ekki hugmynd um að um væri að ræða kött í eigu annarrar manneskju.

Þetta kemur fram í frétt RÚV.

Í fréttinni er rætt við Maríu Kristjánsdóttur rannsóknarlögreglumann hjá Lögreglunni á höfuðborgarsvæðinu. María segir að annar rannsóknarlögreglumaður hafi í morgun farið í verslun A4 í Skeifunni og fengið þar upptökur úr öryggismyndavél verslunarinnar. Á upptökunum sést eins og fram hefur komið grímuklæddur einstaklingur ræna Díegó úr bæli sínu í versluninni.

María segir rannsóknarlögreglumanninn hafa borið kennsl á umrædda manneskju og hafi þegar haldið að heimili viðkomandi. Þegar þangað var komið reyndist Díegó ekki vera þar en kom þá í ljós að hann var í öðru húsnæði og að íbúi þar hefði fengið köttinn í jólagjöf, frá einstaklingnum sem rændi honum. Þar að auki hafði Díegó fengið nýtt nafn, Spori.

María segir að manneskjan sem fékk Díegó í þessa snemmbúnu jólagjöf hafi tekið við honum í góðri trú og hugsað vel um hann. Þegar viðkomandi hafi verið tjáð að Díegó ætti sér heimili hafi hann afhent lögreglunni köttinn þegar í stað. Lögreglan flutti Díegó á lögreglustöðina við Hverfisgötu þaðan sem hann var sóttur af samtökunum Dýrfinnu, sem sérhæfa sig í að finna týnd gæludýr, sem sáu um að koma honum til síns heima.

María segir það liggja fyrir að um þjófnað sé að ræða en að kæra þurfi að berast eigi lögreglan að fara lengra með málið.