Þorgerður Katrín Gunnarsdóttir, formaður Viðreisnar, var gestur Helga Fannars Sigurðssonar og Hrafnkels Freys Ágústssonar í Íþróttavikunni á 433.is þetta skiptið.

Það var meðal annars rætt um landsliðshóp fyrir komandi leiki karlalandsliðsins en þar er enginn Gylfi Þór Sigurðsson. Hann sagði sjálfur í viðtali við Hjörvar Hafliðason að það hafi verið sameiginleg ákvörðun hans, Age Hareide landsliðsþjálfara og KSÍ.

„Ég held hann sé bara að hugsa sig um og pæla í framhaldinu. Hann er líka með öll þessi námskeið núna og nóg að gera,“ sagði Hrafnkell um málið, en Gylfi er með tækniskóla á sínum vegum.

Nánar var rætt um Gylfa og í kjölfarið barst ákvörðun hans um að fara í Val síðasta vetur í tal. Hann er uppalinn FH-ingur og Þorgerður mikill stuðningsmaður Hafnarfjarðarliðsins. Hún hefði svo sannarlega viljað fá hann heim og fannst miður að missa af honum.

„Já, mér fannst það erfitt. En félagið hefur auðvitað ekkert tilkall til að börn þess komi aftur þangað. Ég skil alveg af hverju hann fór þangað. Valur hefur forskot á öll önnur félög hér heima á Íslandi – og kannski Víkingur ef þeir halda svona áfram í Evrópukeppninni.

En ég hefði viljað sjá hann heima í Krika og bind enn vonir við að hann endi ferilinn þar,“ sagði Þorgerður.

Umræðan í heild er í spilaranum.

Íþróttavikan er í boði Bola léttöl og Lengjunnar