Það er ljóst að aðeins 2500 manns komast á leik Víkings og Breiðabliks á sunnudag þar sem úrslitaleikur Bestu deildar karla fer fram.

Víkingar létu Blika fá 10 prósent af miðunum þrátt fyrir að í reglum komi fram að þeir hefðu aðeins þurft að vera 5 prósent.

Ljóst er að miklu færri Blikar komast á völlinn en hafa áhuga á því að mæta. „Því miður er staðan þannig að Breiðablik fær aðeins 250 miða frá Víkingum á leikinn á sunnudaginn. Þetta er erfitt og margir svekktir með að komast ekki á völlinn, þar eru ungir Blikar og þeir sem hafa mætt á alla leiki í tugi ára. Við þéttum hins vegar raðirnar sem aldrei fyrr og okkar sameiginlega markmið er að koma Íslandsmeistaratitli númer 2 þetta sumarið í Smárann,“ segir á vefsvæði Breiðabliks.

Félagið birtir svo skilaboð sem Guðmundur Jóhannesson einn dyggasti stuðningsmaður liðsins sendi félaginu en hann gæti átt von á því að fá miða. „Sæll félagi, ég er „Afreksbliki“ og hef mætt á nánast alla leiki Breiðabliks sl. 20 ár og sl. 15 ár ávallt grænklæddur og reynt að hvetja sem mest. Með aldrinum endist röddin vart nema annan hálfleikinn, því hef ég ákveðið að fái ég miða í útdrættinum muni ég senda þér miðann til handa einhverjum úr „STUÐNINGSSVEITINNI,“ skrifaði Guðmundur.

Guðmundur gengur alltaf á heimaleiki Breiðablik af Kársnesinu þar sem hann býr og þessi mynd af honum efst í fréttinni náðist fyrir leikinn á móti ÍA um daginn

„Mikið væri gott ef heimurinn ætti fleiri eins og Guðmund,“ segir í tilkynningu Blika.