Sean Combs, betur þekktur sem Diddy, er sakaður um að hafa nauðgað 13 ára stúlku í slagtogi við tvo frægra einstaklinga. Fórnarlambið, sem er 37 ára í dag, kærði Diddy á sunnudag.

Deadline greindi frá málinu.

Konan lagði fram kæru gegn Diddy í dómshúsi í New York. Að hennar sögn átti nauðgunin sér stað þann 7. september árið 2000, í eftirpartíi MTV tónlistarverðlaunanna.

Stúlkan hafði farið inn í tómt svefnherbergi til að leggja sig þar sem hún hefði orðið ringluð eftir drykk sem hún drakk í partíinu. Þá hafi Diddy komið inn í herbergið ásamt frægum karli og frægri konu.

Diddy hafi nálgast stúlkuna með brjálað augnaráð, gripið um hana og sagt að hún væri reiðubúin til að vera í teiti, „You are ready to party!“

Diddy hafi svo fleygt stúlkunni til fræga karlsins, sem hafi byrjað að reita af henni spjarirnar. Sá maður hafi haldið henni niðri á meðan hann nauðgaði henni en Diddy og fræga konan staðið hjá og horft á. Eftir það hafi Diddy sjálfur nauðgað stúlkunni á meðan hin frægu horfðu á.

Þá sagði fórnarlambið að Diddy hafi reynt að neyða hana til þess að veita sér munnmök en hún slegið hann í hálsinn þannig að hann hætti. Þá hafi hún komist út úr herberginu og faðir hennar sótt hana í partíið.

Konan sagði að þetta hefði haft mikil áhrif á líf hennar. Hún hafi meðal annars barist við þunglyndi.