Ásta Eir Árnadóttir, fyrirliði Blika er liðið varð Íslandsmeistari á dögunum, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.
Nik Chamberlain stýrði Blikum að titlinum á sínu fyrsta tímabili með liðið. Ásta sá strax er hann tók við að eitthvað gott var í vændum.
„Ég fékk strax á tilfinninguna þegar umræðan fór af stað að þetta væri maðurinn sem okkur vantaði. Hann er mjög heiðarlegur og mjög góður að þjálfa, með skýra sín á hvað hann vill gera. Hann er líka góður að fá aðra með sér, sem getur verið erfitt.
Við þurftum aðeins meiri ramma og meira utanumhald. Með fullri virðingu fyrir þeim þjálfurum sem voru á undan var smá kaos í gangi. Það var ekki nógu skýr lína,“ sagði Ásta í þættinum.
Nik innleiddi nýtt leikkerfi í Kópavoginum, fór í tígulmiðju og var Ásta til að mynda færð úr bakverði í miðvörð.
„Hann ræðir það bara strax við mig. Fyrsta sem ég sagði var að ég væri til en að það þyrfti að þjálfa mig. Þó ég sé reynslumikil hafði ég aldrei spilað þessa stöðu. Hann var alveg heiðarlegur, sagði að hann teldi mig ekki ráða við að spila sem sóknarbakvörður. Ég móðgaðist ekki en vildi fá að prófa það.“
Umræðan í heild er í spilaranum.
