Að sögn Gríms Grímssonar yfirlögregluþjóns er ekki tímabært að gefa neitt út um raunverulegan vettvang andláts stúlku sem fannst látin við Krýsuvíkurveg á sunnudagskvöldið. Faðir stúlkunnar, Íslendingur á fimmtugsaldri, situr nú í gæsluvarðhaldi grunaður um að verða valdur að láti stúlkunnar sem hann hafði í umgengni á sunnudaginn. Þetta kom fram í hádegisfréttum RÚV. Ekki hafa frekari handtökur farið fram en Grímur sagði í gær við Vísi að ekki væri grunur um að sakborningar málsins séu fleiri, en í samtali við mbl.is í dag segist hann ekki úttala sig um þann möguleika en vel geti gerst við rannsókn mála að fleiri verði handteknir.

Grímur Grímsson segir lítið nýtt að frétta í málinu sem ekki hafi áður komið fram og sagði aðspurður að meðal þess sem er til rannsóknar sé hvar stúlkan lét lífið. „Það er ekki tímabært að gefa neitt út um það. Það er bara til rannsóknar en auðvitað höfum við ákveðnar kenningar um hvað er líklegt í því samhengi en það er enn til rannsóknar,“ sagði Grímur um það hvort stúlkunni var ráðinn bani í hrauninu við Krýsuvíkurveg eða annars staðar. Ekki hafa frekari skýrslutökur farið fram en hingað til hefur faðirinn lítið viljað tjá sig.

Snorri Sturluson, verjandi föðurins, segir föðurinn ekki mótmæla gæsluvarðhaldskröfu en formlegur kærufrestur til Landsréttar rennur út á fimmtudag.