Maður sem er í haldi lögreglu, grunaður um að hafa banað tíu ára gamalli dóttur sinni, hefur áður komið við sögu lögreglu. Árið 2007 var hann sakfelldur fyrir innflutning á kókaíni í sölu- og dreifingarskyni.
Hann var síðan í fréttum í maímánuði síðastliðnum er lögregla lýsti eftir honum. Kom þá fram að síðast hefði verið vitað um ferðir hans í Grafarvogi. Maðurinn er búsettur í því hverfi.
Maðurinn er á fimmtugsaldri. Stúlkan sem lést er fædd árið 2014.
Ekki liggur fyrir hvort krafist verður gæsluvarðhalds yfir manninum en það er talið líklegt. Verður ákvörðun um það tekin síðar í dag. Grímur Grímsson, yfirlögregluþjónn á rannsóknarsviði Lögreglunnar á höfuðborgarsvæðinu, sagði í viðtali við DV fyrr í dag, að of snemmt væri að fullyrða að lögregla væri komin með skýra mynd af atburðinum, til þess væri of skammt liðið.
Fyrir liggur hins vegar að maðurinn hafði sjálfur samband við lögreglu um kvöldmatarleytið í gærkvöld. Hann var skömmu síðar handtekinn á Krýsuvíkursvæðinu. Látin dóttir hans var þar með honum.
