Ísland vann góðan sigur á Svartfjallalandi í Þjóðadeildinni í kvöld en leikið var á Laugardalsvelli.

Ísland vann 2-0 heimasigur en Orri Steinn Óskarsson og Jón Dagur Þorsteinsson komust á blað fyrir okkar menn.

Jóhann Berg Guðmundsson, fyrirliði Íslands, var að vonum ánægður eftir lokaflautið í kvöld.

,,Eins og ég sagði þá var þetta fagmannleg frammistaða, tvö mörk úr hornum og við hefðum getað skorað fleiri mörk og gáfum ekki mikið af tækifærum á okkur. Það var kominn tími á að vinna í þessari deild,“ sagði Jóhann eftir leik.

,,Það voru síðustu orðin sem ég sagði áður en við fórum út að það væri kominn tími á að ná í sigur og kannski bera meira virðingu fyrir þessari keppni, hún hefur gefið okkur tvo sénsa á að koma okkur á stórmót.“

Jóhann fór yfir mörk Íslands í stuttu máli en þau voru bæði skoruð eftir hornspyrnu – Jóhann lagði upp fyrra markið á Orra Stein Óskarsson.

,,Við höfum fengið Sölva inn í teymið sem fór vel yfir þetta á æfingum með okkur og fór yfir þeirra veikleika og mér fannst við nýta það gríðarlega vel í dag. Eitthvað er kallinn að gera rétt!“