Stuðningsmenn Liverpool voru flestir mjög ánægðir með fréttir fimmtudagsins en greint var frá því að Sepp van den Berg væri farinn frá félaginu.

Van den Berg er 22 ára gamall miðvörður en hann gekk í raðir Brentford fyrir um 30 milljónir punda.

Hollendingurinn hefur lengi verið orðaður við brottför en hann spilaði með Mainz í þýsku úrvalsdeildinni á síðustu leiktíð.

Þar stóð varnarmaðurinn sig mjög vel á lánssamningi og var í kjölfarið orðaður við brottför frá enska félaginu.

Þeir sem styðja Liverpool telja að félagið sé að gera virkilega vel með því að selja leikmanninn sem virtist ekki eiga framtíð fyrir sér hjá félaginu.

,,Að fá 30 milljónir fyrir hann eru ótrúleg viðskipti af hálfu félagsins,“ skrifar einn á Twitter eða X.

,,Við fengum 57 milljónir fyrir Fabio Carvalho og Van den Berg, stórkostlegt afrek hjá herra Richard Hughes,“ bætir annar við.

Fleiri taka undir ummælin en Carvalho var einnig seldur til Brentford fyrr í þessum sumarglugga.