Það eru ekki margir stuðningsmenn í Evrópu sem eru jafn ástríðufullir og þeir sem styðja við bakið á Legia Warsaw í Póllandi.

Legia spilaði við lið Caernarfon frá Wales í Sambandsdeildinni á fimmtudag en stuðningsmönnum liðsins var bannað að mæta á völlinn.

Ástæðan er hegðun þeirra á síðustu leiktíð en þeir pólsku gerðu allt vitlaust í leik gegn enska liðinu Aston Villa í sömu keppni.

Þeim tókst meðal annars að særa tvo lögreglumenn sem og lögregluhest fyrir þá viðureign en leikið var á Villa Park.

Legia var því sett í bann af UEFA og var stuðningsmönnum liðsins bannað að mæta á útileiki um óákveðinn tíma.

Þeir fundu þó lausn á málinu gegn Caernarfon og tóku yfir hjólhýsagarð í nágrenninu svo þeir gætu stutt sitt lið í viðureigninni.

Leiknum lauk með öruggum 5-0 sigri pólska liðsins sem vann fyrri leikinn sannfærandi 6-0 á heimavelli.