Hollenskur hreimur heyrist hátt á æfingasvæði Manchester United þessa dagana en þar er ekki um að ræða Erik ten Hag.

Daily Mail fjallar um það að Ruud van Nistelrooy nýr aðstoðarmaður Ten Hag sé mikið að stýra æfingum.

Nistelrooy mætti til starfa í sumar og er byrjaður að láta til sín taka.

„Van Nistelrooy er mjög upptekin að stýra æfingum og fá leikmenn til að færa boltana út á kant og koma honum svo fyrir. Maðurinn þekkir það að skora mörk, hann skoraði 150 mörk í 219 leikjum,“ sagði í umfjöllun Daily Mail.

Van Nistelrooy er sagður góður í mannlegum samskiptum og að hann eigi núna í miklum samskiptum við Marcus Rashford.

Rashford átti ömurlegt síðasta tímabil og er það von Ten Hag að Nistelrooy geti komið og kveikt líf í kappanum.