Dr. Football snéri aftur í gær eftir sumarfrí en Hjörvar Hafliðason stjórnandi þáttarins ræddi um málefni líðandi stundar og eitt af þeim var málefni Breiðabliks.
Hjörvar telur að mikið af fólki sé að starfa hjá félaginu sem hafi litla reynslu og þetta geti reynst dýrkeypt.
„Meðan Víkingar ströggla í Evrópu þá hrynja inn peningar í Smárann. Willum til Birmingham fyrir metfé, ching ching. Enn ein millifærslan út af Sverri Inga, ching ching. Svo var Patrik að fara til Belgíu, ching ching. Það mokast inn peningur í Smáran, á meðan þetta er högg fyrir Víkinga,“ sagði Hjörvar um stöðu mála.
Breiðablik er að ganga í gegnum breytingar utan vallar en Eysteinn Pétur Lárusson er að hætta sem framkvæmdarstjóri og Karl Daníel Magnússon hans nánasti aðstoðarmaður sagði upp störfum á dögunum.
„Það er enginn þekking hjá Breiðablik hvernig á að fara með þessa peninga, ekkert fótbolta fólk að taka ákvarðanir um fótbolta. Þeir voru að ráða nýjan framkvæmdarstjóra, Tanja Tómasdóttir. Tekur við af reynslumiklum Eysteini, Kalli er að fara líka. Hann hefur verið allt í öllu síðustu tvö ár,“ sagði Hjörvar og ræddi einnig þegar félagið rak reyndan mann úr starfi á síðasta ári.
„Þeir losuðu sig við Óla Kristjáns sem var kannski með of miklar skoðanir.“
Fleiri breytingar eru hjá Blikum þar sem fólk með mikla reynslu er að fara úr starfi. „Þetta lítur skringilega út með Breiðablik, Hákon Sverrisson er að hætta. Það er það stærsta síðan að Ágúst Þór Ágústsson skipti um starfsvettvang. Hann hefur verið á hliðarlínunni á öllum fótboltamótum frá 1996.“
Arnar Sveinn Geirsson fyrrum leikmaður Vals lagði orð í belg. „Það er hard reset í gangi þarna, fyrir svona klúbb sem er með svona svakalega umgjörð. Marga yngri iðkendur, mikið af fólki á hverjum degi. Þetta er svakalegur rekstur, ég held að þú þurfir ekki alltaf reynslu en þú þarft hana á einhverjum stöðum. Nýr framkvæmdarstjóri kemur reynslulítill inn í þennan heim, Dóri Árna er með litla reynslu á þessu sviði,“ sagði Arnar.
Hjörvar telur að Víkingur og Breiðablik sem hafa verið tvö bestu lið landsins síðustu ár séu á ólíkum stöðum. „Víkingar með allt á hreinu fótboltalega, Blikar með allt á hreinu peningalega. Tvær andstæður sitthvoru megin við dalinn,“ sagði Hjörvar.
