Bandaríkjamaðurinn og rapparinn heimsfrægi Snoop Dogg á það til að fylgjast með fótbolta en er ekki með allt á hreinu þegar kemur að erkifjendum á Englandi.

Snoop hefur greint frá því að hann hafi verið nálægt því að lenda í alvöru vandræðum er hann var staddur í Liverpool á England í vinnuferð.

Hann labbaði um götur borgarinnar í jakka Manchester United – eitthvað sem heimafólkið tók virkilega illa í og fékk hann svo sannarlega að heyra það frá ókunnugum aðilum.

Snoop viðurkennir að hegðun hans hafi í raun verið barnaleg en hann þekkir enska boltann ekki inn og út eins og margir aðrir.

,,Í dag veit ég að það er ekki sniðugt að klæðast treyju óvinaliðsins á þeirra svæði,“ sagði rapparinn.

,,Ég vissi það ekki til að byrja með, fyrst þegar ég kom til Englands þá klæddist ég Manchester United jakka og var staddur í Liverpool.“

,,Fólk hugsaði með sér hvað í andskotanum ég væri að gera, taktu þennan jakka af þér!“