Það er bull að aðstoðarmaður Erik ten Hag, stjóra Manchester United, sé búinn að ákveða það að yfirgefa félagið.

Frá þessu greina enskir miðlar en um er að ræða Steve McClaren sem er orðaður við önnur störf og þá sem aðalþjálfari.

Athygli vakti að McClaren ferðaðist ekki með United til Los Angeles í vikunni þar sem liðið er í æfingaferð.

Daily Mail segir að McClaren sé að jafna sig eftir aðgerð og að það sé ástæðan fyrir því að hann sé ekki með í för.

Áður var talað um að McClaren væri í viðræðum við nokkur félög sem og landslið um að taka við sem aðalþjálfari en ekkert hefur fengist staðfest í þeim málum.

Meiri líkur eru á að McClaren verði áfram við hlið Ten Hag í vetur en enska úrvalsdeildin hefst um miðjan næsta mánuð.