Síðustu mánuði hefur verið í undirbúningi tilraunaverkefni þar sem m.a. hafa farið fram mælingar á líkamlegu ástandi KSÍ-dómara í samstarfi rannsóknaraðila, KSÍ, Háskóla Íslands og fleiri aðila. Mælingarnar fara fram undir stjórn Milos Petrovic, yfirmanns rannsóknarmiðstöðvar íþrótta- og heilsuvísinda við Háskóla Íslands, og Guðbergs K. Jónssonar, forstöðumanns Rannsóknarstofu um mannlegt atferli, Háskóla Íslands, Valgeirs Einarssonar sjúkraþjálfarateymi KSÍ, og hefur Gunnar Jarl Jónsson, fyrrverandi KSÍ/FIFA-dómari og núverandi meðlimur í dómaranefnd KSÍ haldið utan um verkefnið KSÍ-megin.

Verkefnið í heild er talsvert umfangsmeira og snýr að því að setja mælistiku á lýðheilsulegt vægi hreyfingar ýmsum hópum, m.a. eldri iðkendum, og felur í sér mælingar á ýmsum sál-, félags- og líkamlegum þáttum iðkenda, ásamt leiðbeinandi ráðgjöf um áframhaldandi hreyfingu og/eða endurhæfingu.

Markmið fyrsta hluta verkefnisins miðaði að því að greina líkamlegar kröfur og frammistöðusnið KSÍ-dómara, og hvernig þeir takast á við þær líkamlegu kröfur sem gerðar eru til þeirra. Rannsóknin, sem er sú fyrsta sinnar tegundar sem gerð er á Íslandi, náði til 19 íslenskra dómara, sem voru metnir út frá ýmsum líkamlegum eiginleikum.

Niðurstöður gefa til kynna að heilt yfir búa þeir dómarar sem voru mældir yfir „miklum styrk, almennum liðleika og þá sérstaklega í neðri hluta líkamans, sem er nauðsynlegt fyrir hlutverk þeirra á vellinum“. Jafnframt kemur fram í niðurstöðum að mælingarnar veiti „dýrmæta innsýn í líkamlegar kröfur til dómara, og niðurstöðurnar gefa mikilvægar upplýsingar um frekari markvissa þjálfun og þjálfunaráætlanir til að auka frammistöðu dómara, draga úr meiðslahættu, og stuðla að víðtækari skilningi á frammistöðu dómara á efsta þrepi á Íslandi“.