Hákon Rafn Valdimarsson, landsliðsmarkvörður og leikmaður Brentford, er í skemmtilegu viðtali við heimasíðu félagsins í dag. Þar ræðir hann meðal annars þegar hann mætti Cristiano Ronaldo og portúgalska landsliðinu í fyrra.
Hákon er nú staddur með Brentford í Portúgal og spilaði hann hálfleik í 1-1 jafntefli gegn Benfica í gær. Að því tilefni var Portúgals-leikurinn rifjaður upp. Það var fyrsti keppnisleikur Hákons með íslenska landsliðinu og fór hann 2-0 fyrir Portúgal. Honum fannst súrealískt að mæta Cristiano Ronaldo.
„Í göngunum fyrir leik sá ég hann og hugsaði: Vá. Ég hef fylgst með honum frá því ég var krakki. Hann var uppáhaldsleikmaðurinn minn og það var frábært að mæta honum – og sérstaklega gaman að honum hafi ekki tekist að skora á móti mér,“ segir Hákon.
„Það var frábært fyrir mig, fjölskylduna og vini mína að spila fyrsta keppnisleikin minn. Við spiluðum á móti frábæru liði og ég átti góðan leik. Það er gaman að spila með landsliðinu og ég reyni að njóta athyglinnar eins og ég get.“
Hákon kveðst þá spenntur fyrir komandi tímum með Brentford, en hann gekk í raðir félagsins í janúar.
„Ég vil bæta mig eins og ég get á þessu undirbúningstímabili. Ég vandist því í Svíþjóð að undirbúningstímabilið sé fjórir mánuðir svo það er allt öðruvísi að fá fimm vikur. En ég mun gera mitt besta. “
