KR er að eiga skelfilegt tímabil og situr í níunda sæti Bestu deildarinnar, 2 stigum fyrir ofan fallsvæðið. Þá hefur liðið ekki unnið fótboltaleik síðan 20. maí. Gregg Ryder var látinn taka poka sinn sem þjálfari liðsins fyrir rúmum mánuði síðan og tók Pálmi Rafn Pálmason við út tímabilið. Síðan hefur gengið bara versnað ef eitthvað er.
Óskar var ráðinn í starf hjá KR fyrri hluta síðasta mánuðar, í kjölfar þess að hann sagði starfi sínu hjá Haugesund í Noregi lausu. Var hann fenginn í ráðgjafahlutverk til að byrja með en svo var tilkynnt að hann yrði yfirmaður knattspyrnumála frá og með næstu mánaðarmótum.
Nú velta allir því fyrir sér hvort Óskar, sem yfirgaf Breiðablik eftir síðustu leiktíð, taki svo við sem þjálfari KR. Í síðustu viku sagði sparkspekingurinn Kristján Óli Sigurðsson frá því að Óskar tæki við eftir tímabil. Tómas Þór Þórðarson tók svo í sama streng í útvarpsþættinum Fótbolti.net um helgina.
Það sem ýtir enn frekar undir það að Óskar sé að taka við er það að KR hafi samið við Alexander Helga Sigurðarson, leikmann Breiðabliks, á dögunum. Sá færir sig yfir í Vesturbæinn í haust. Það má ætla að Óskar, sem starfaði lengi með miðjumanninum í Kópavoginum, hafi verið með puttana í þessum félagaskiptum.
Heimildir 433.is herma þá að fólk innan og í kringum KR telji það alveg klárt að Óskar taki við sem þjálfari eftir tímabil. Óskar hafi samþykkt þetta og það muni engu skipta þó það fari svo að KR spili í Lengjudeildinni á næstu leiktíð, en eins og áður kom fram er liðið í alvöru fallbaráttu sem stendur.
Sömu heimildir herma að Óskar hafi fengið veglegt samningstilboð frá stjórnendum KR og að endingu látið slag standa. Það má því búast við að hann taki við í haust.
