Rio Ferdinand er ekki eini fyrrum leikmaður Manchester United sem hvatti varnarmanninn Leny Yoro til að semja við félagið.
Annar fyrrum leikmaður United, Angel Gomes, ræddi mikið um United við Yoro en þeir voru saman hjá Lille í Frakklandi.
Gomes fékk ekki mikið að spila á Old Trafford en hafði þó ekkert nema góða hluti að segja um félagið.
,,Við ræddum mikið um United. Gomes sagði mér að þetta væri stærsta félag heims,“ sagði Yoro.
,,Þið vitið, stuðningsmennirnir, hvernig þeir spila, æfingasvæðið, allt þarna er risastórt og er ótrúlegt að upplifa.“
,,Ég ræddi við hann á hverjum degi og hann hjálpaði mér að taka ákvörðun. Hann er mjög ánægður fyrir mína hönd.“
