Móðir Kylian Mbappe, Fayza Lamari, útilokar ekki að hann muni kæra fyrrum félag sitt, Paris Saint-Germain.

Mbappe telur sig eiga inni um 80 milljónir evra eftir að hafa yfirgefið félagið í sumar en hann samdi við Real Madrid.

PSG hefur ekki gert upp við Mbappe en hann telur sig eiga inni bónusgreiðslur og tvo mánuði ógreidda.

Lamari vonar að málið verði leyst sem allra fyrst en Mbappe mun ekki játa sig sigraðan ef PSG neitar að borga upphæðina.

,,Þetta mál er ennþá í gangi. Nú er þetta í höndum Kylian og hans fólks,“ sagði Lamari við Le Parisien.

,,Ég treysti því að PSG komi hlutunum í lag fljótlega. Við höfum fengið svar frá þeim og ákvörðun verður tekin.“

,,Ef okkar eini möguleiki er að kæra félagið þá auðvitað gerum við það. Ég vona að þessi samningur verði virtur.“