Það var baulað á varnarmanninn Marc Cucurella í hvert einasta skipti sem hann snerti boltann í úrslitaleik EM í gær.

Þjóðverjar eru ekki hrifnir af Cucurella sem fékk boltann í höndina í 8-liða úrslitum gegn heimaþjóðinni og var það innan vítateigs.

Cucurella stoppaði skot Jamal Musiala að marki með hendinni en dómarar í VAR herberginu ákváðu að ekkert yrði dæmt.

Bakvörðurinn var því afskaplega óvinsæll í kjölfarið og var baulað verulega á hann í undanúrslitum gegn Frökkum.

Það lagaðist ekki í gær í 2-1 sigri Spánverja á Englendingum í úrslitaleiknum en Cucurella var óvinsælasti leikmaður vallarins.

Hann hafði sjálfur beðið heimamenn um að hætta baulinu fyrir úrslitaleikinn en sú ósk var ekki uppfyllt.