Sigríður Á. Andersen, lögmaður og fyrrverandi dómsmálaráðherra, fylgist greinilega með EM í Þýskalandi eins og aðrir. Hún var ekki heilluð af frammistöðu stórstjörnu Frakka er liðið datt út gegn Spáni í undanúrslitum í gærkvöldi.

Spánn vann afar sanngjarnan 2-1 sigur á Frakklandi í gær. Síðarnefnda liðið hefur heillað fáa á mótinu á meðan spænska liðið, með þá Lamine Yamal og Nico Williams í fararbroddi, þykir hafa verið hvað skemmtilegasta liðið.

Kylian Mbappe, besti leikmaður franska liðsins, er einn af þeim sem hafa valdið vonbrigðum. Kappinn skrifaði á dögunum undir hjá Real Madrid eftir frábær ár hjá Paris Saint-Germain.

Sigríður er þó ekki sannfærð um að Mbappe hafi það sem þarf eftir að hafa horft á hann í gærkvöldi.

„Þessi Kiljan Mpabbé – hvaða erindi á hann til okkar í konunglega, eða í LaLiga yfirleitt? Veit það einhver?“ spurði hún á samfélagsmiðlinum X.

Nokkrir góðir hafa brugðist við færslu Sigríðar og benti Hjörvar Hafliðason henni til dæmis á að Mbappe ógnaði sífellt með hraða sínum og krafti.

Þessi Kiljan Mpabbé – hvaða erindi á hann til okkar í konunglega, eða í LaLiga yfirleitt? Veit það einhver?

— Sigríður Á. Andersen (@siggaandersen) July 9, 2024