Frakkland er komið áfram í undanúrslit Evrópumótsins og mætir þar Spáni. Þetta varð ljóst eftir sigur á Portúgal í vítaspyrnukeppni.

Venjulegur leiktími og framlenging liðanna var með leiðinlegasta móti og var markalaust.

Frakkar höfðu afskaplega lítinn áhuga á að sækja og nokkurn brodd vantaði í sóknarleik Portúgals.

Þegar komið var í vítaspyrnukeppni byrjaði Ousmae Dembele á að skora fyrir Frakka. Cristiano Ronaldo fór fyrstur á punktinn hjá Portúgal og skoraði af fádæma öryggi.

Youssouf Fofana var næstur fyrir Frakka og skoraði með skoti á mitt markið. Bernardo Silva fór næst fyrir Portúgal og skoraði af öryggi.

Miðvörðurinn, Jules Kound var sá þriðji fyrir Frakka og skoraði af öryggi. Joao Felix fór næst fyrir Portúgal og skaut í stöngina, sá fyrsti til að brenna af.

Bradley Barcola var fjórði Frakkinn á punktinn og skoraði örugglega, Diogo Costa fór enn á ný í vitlaust horn. Sá fjórði hjá Portúgal var Nuno Mendes sem gerði engin mistök og skoraði af öryggi.

Theo Hernandez var svo sá fimmti fyrir Frakka og skoraði af öryggi og skaut Frökkum í undanúrslit. Hinn 39 ára gamli Cristiano Ronaldo hefur því spilað sinn síðasta leik á Evrópumóti.