Valur féll úr leik í undanúrslitum Mjólkurbikarsins á dögunum gegn KA. Liðið er þá 8 stigum á eftir toppliði Víkings í Bestu deildinni en á þó leik til góða. Það var rætt um gengi Vals í hlaðvarpi Íþróttavikunnar.

„Það stefnir í það að Valur fari í titlalaust tímabil annað árið í röð. Það er bara ekki gott,“ sagði Hörður Snævar Jónsson þar.

Helgi Fannar Sigurðsson tók undir þetta.

„Það er eiginlega bara óásættanlegt, ég tala nú ekki um þar sem þú færð Gylfa Þór Sigurðsson heim fyrir þetta tímabil,“ sagði hann.

„Og þú færð jafnbesta leikmann Íslandsmótsins til þessa, Jónatan Inga, hann er búinn að vera frábær,“ skaut Hörður þá inn í.

Helgi tók til máls á ný.

„Þetta er „win now“ lið sem er verið að setja saman á Hlíðarenda og að vinna ekkert enn eitt árið er bara óásættanlegt.“

Arnar Grétarsson er á sínu öðru tímabili sem þjálfari Vals. Liðið vann engan titil í fyrra heldur.

„Það var fín framför á liðinu undir stjórn Arnars Grétarssonar í fyrra en bikarinn situr væntanlega í mönnum. Tap gegn Grindavík á heimavelli í fyrra og nú lið í fallbaráttu, KA. Ef ég væri stuðningsmaður Vals myndi ég gera kröfu að í níu af hverjum tíu leikjum vinni Valur KA,“ sagði Hörður en benti á að ekki væri öll von úti fyrir Val á þessari leiktíð.

„Við tölum eins og þetta sé búið en þeir verða að trúa því að þetta sé ennþá séns, að Víkingarnir gefi eftir í sinni Evrópureisu.“