Erjona Sulejmani er ekki endilega nafn sem margir kannast við en hún setti hins vegar allt í háaloft fyrir um sjö árum síðan. Hún minnti á sig á dögunum þegar hún mætti að sjá sína menn í Albaníu mæta Króötum á EM í Þýskalandi.

Sulejmani er fyrrum eiginkona Blerim Dzemaili, sem spilaði til að mynda með Bolton og Napoli á ferlinum, auk svissneska landsliðsins. Hún var mætt að styðja sinn mann á EM 2016 í Frakklandi. Þar var það útlit hennar sem vakti mikla athygli erlendra götublaða.

Ári síðar fór hins vegar allt í háaloft í hjónabandi Sulejmani og Dzemaili í kjölfar viðtals sem hún fór í. Þar ræddi hún frammistöðu eiginmannsins í svefnherberginu.

„Stundum við kynlíf fyrir leiki hjá honum? Fótboltamenn eru ekkert frábærir í rúminu. Þeir vilja helst sjá um þetta sjálfir,“ sagði Sulejmani í umræddu viðtali.

Þetta á að hafa verið upphafið að endalokum hjónabands hennar og Dzemaili. Að lokum var skilnaður þeirra heldur ljótur og bannaði knattspyrnumaðurinn Sulejmani til að mynda að nota eftirnafn sitt áfram.

Sulejmani gengur þó vel í dag og er með yfir hálfa milljón fylgjenda á Instagram.