KA er komið í úrslitaleik bikarsins annað árið í röð eftir sigur á Val í undanúrslitum en leikið var á Akureyri nú í kvöld.

KA komst yfir eftir aðeins fjögurra mínútna leik þegar besti maður liðsins, Hallgrímur Mar Steingrímsson skoraði.

Gestirnir frá Hlíðarenda voru meira með boltann í leiknum og það skilaði árangri á 39. mínútu þegar Gylfi Þór Sigurðsson lagði upp fyrir Patrick Pedersen.

Adam var þó ekki lengi í paradís því fimm mínútum síðar kom Jakob Snær Árnason heimamönnum aftur yfir. Staðan 2-1 fyrir KA í hálfleik.

Í síðari hálfleik var það svo Daníel Hafsteinsson sem kom KA í 3-1 áður en Birkir Már Sævarsson lagaði stöðuna.

Nær komst Valur ekki og KA er komið í úrslitaleikinn annað árið í röð, liðið tapaði gegn Víkingi í úrslitum í fyrra en Víkingar geta bókað sig í úrslitaleikinn með sigri gegn Stjörnunni á morgun.