Riðlakeppni EM í Þýskalandi var rækilega gerð upp í nýjasta þætti af Íþróttavikunni. Þar fengu þeir Helgi Fannar og Hrafnkell Freyr lögfræðinginn og hlaðvarpsstjörnuna Jóhann Skúla Jónsson í heimsókn.

Ítalir voru ekki beint sannfærandi í riðlakeppninni, fóru áfram á 4 stigum eftir dramatískt jöfnunarmörk gegn Króötum í lokaleiknum.

Þeir eiga þó ágætis leið fyrir hendi, mæta Sviss í 16-liða úrslitum og sigur þar þýðir leikur gegn Englandi eða Slóvakíu í 8-liða úrslitum.

„Þeir eru að fara að ranka við sér í undanúrslitum,“ sagði Helgi en Hrafnkell tók alls ekki undir þetta.

„Það er bara ekki möguleiki,“ sagði hann en Helgi stóð fastur á sínu.

„Þeir vinna Sviss og taka svo England. Leiðin þeirra er nefnilega mjög þægileg,“ sagði hann.

„Þægilegt og ekki þægilegt. Það er ekkert þægilegt að fá Englendinga í 8-liða úrslitum,“ skaut Jóhann inn í.

„England er ekki að fara að gera neitt,“ sagði Helgi þá en rökræður héldu áfram.

„Ertu á því að Ítalía geri eitthvað frekar en England? England er bara með miklu betri leikmenn,“ sagði Hrafnkell.

„Það hefur aldrei gefið Englandi neitt að vera með góða leikmenn,“ svaraði Helgi þá en Hrafnkell heldur að nú standist England prófið.

„Ég held að þegar stóra mómentið kemur muni England vinna Ítalíu,“ sagði hann.

„England þekkir ekkert annað en að klikka á stóru mómentunum,“ sagði Helgi að endingu um málið.

Umræðan í heild er í spilaranum.